«Судың да сұрауы бар» демекші, мемлекеттік қолдаудың «шапағатына» талап үдесінен шығатын тауар өндірушілер ғана бөленуі тиіс. Мұны мықтап қаперге алған атқамінерлер мөлдірлікті арттыруды ұйғарған.

Биыл демеуқаржыландыруға дәме­лі бордақылау алаңдарының, құс және шошқа шаруашылықтарының құжат­тарын зерделеу жүйесі әдеттегіден ерек. Олардың субсидиялау тәртібіне сәйкесті­гін әуелі арнайы комиссия жіті тексере­ді. Оның құрамына мемлекеттік орган­дардың, қоғамдық ұйымдардың өкілдері енген. Комиссия «Атамекен» ұлттық кәсі­пкерлер палатасының аймақтық өкілдік­тері негізінде құрылған.

 – Өткен жылдардың тәжірибесін сара­лап, мөлдірлікті арттыру үшін өзгеріс енгізу ұсынылды. Комиссия аймақтық палатаның мамандарынан, елімізде аккредитацияланған қауымдастықтар­дың өкілдерінен, ауыл шаруашылығы бөлімдерінің мамандарынан құралған. Олар бордақылау алаңдарының құс пен шоқша шаруашылықтарының демеуқар­жыландыру талаптарына сәйкестігін тек­середі. Егер аталған үш саладағы тауар өндірушілер жүгінсе, 5 күн ішінде комис­сия өкілдері шығып, ұсынылған құжат­тардың шындыққа сәйкестігін бағам­дайды. Оның арқасында субъективтілік­ке жол берілмейді. Комиссия қорытын­ды шығарып, оны тауар өндірушіге табыстайды. Олқылықтар табылса, оның орны толтырылады. Ал құжаттар шару­ашылықтың жағдайына сәйкес кел­се, онда технологиялық карта жасалып, демеуқаржыландыруға өтінім жолдауға жол ашылады, – деп түсіндірді «Атаме­кен» ұлттық кәсіпкерлер палатасының өкілі Алмат Әубәкіров.

Егер аталған үш бағыт бойынша өнім өндіретін шаруаларда комиссияның оң қорытындысы болмаса, олар демеуқар­жыландыруға өтінім тапсыра алмайды. Бүгінде тиісті комиссиялар барлық өңі­рлерде тер төгеді. Оларға ауылшару­ашылық тауар өндірушілер жыл бойы жүгіне алады. Теріскейде де жаңа жүйе бойынша жұмыс жүргізілуде. 13 аудан­да арнайы комиссия құрылған. Тек әзір­ге солтүстікқазақстандық тауар өндіруші­лер тарапынан асқан белсенділік байқал­майды. 8 шаруашылық деме­уқаржыландыру талаптарына сәйкестік бойынша тексерілген.

– Тауар өндірушілер біз­ге ескертпе хат жолдап, талап бойынша 5 күн ішінде комис­сия өкілдері шаруашылыққа бет алады. Оның құрамында 3 адам бар. Бордақылау алаңдары бойын­ша 2 өтінім қарастырылып, оның біреуі құпталды, ал екіншісі инф­рақұрылымның сәйкес келмеуіне байланысты қосымша пысықта­уға жіберілді. Құс шаруашылығы бойынша барлық 6 өтінім бойын­ша оң қорытынды шығарыл­ды. Оның 4-уі жұмыртқа, 2-уі ет бағытында. Ал шошқа шаруашылығы бойынша ешбір тауар өндіруші жүгін­ген жоқ, – деп қолға алынған жұмыстар­ды СҚО Кәсіпкерлер палатасы Агроөнер­кәсіптік кешен бөлімінің басшысы Бауыр­жан Ахметов жіпке тізді.

Бордақылау алаңдарының, құс пен шошқа шаруашылығының технология­лық және өндірістік жағдайы қағаздағы деректерге сәйкес келуі тиіс. «Қыл аяғы іске қосылмаған кәсіпорындарға деме­уқаржы үлестірілген жағдайлар да орын алған. Оған енді жаңашыл жүйе жол бермейді. Өтінімдердің шынайлығын құзыретті және білікті мамандар тексе­реді. Оның қорытындысы және шешім алқалы түрде қабылданады. Егер кәсіпо­рын демеуқаржыландыру талаптарының біріне сәйкес келмесе, кемші тұстарды жою бойынша ескерту жасалады. Кейін олқылықтардың орнын толтырған тауар өндіруші бізге тағы жүгіне алады», – деп жүйенің ерекшелігін түсіндірді ол.

Венера Мұстафина

03.07.2017 ж. мақала