Қарағанды облысында өсірілген эко-бидай алғаш рет Еуропаға экспортталады.

Аймақтың ірі шаруа қожалығы халықаралық органикалық өндіруші сертифатын алу үшін үш жылын сарп еткен екен, деп хабарлайды «Хабар 24» тілшісі.

Орталық Қазақстан фермерлерінің биылғы егінге көңілдері толмай отыр. Бидайдың сабағы қысқа, дәні ұсақ болып шыққан. Тек дақыл желімтегінің жақсы көрсеткішіне қуанып отырмыз дейді. Биыл аймақтың егістік жерлері 886 мың гектарға дейін ұлғайтылған. Фермерлер шілде мен тамыз айында қатты ыстықтың салдарынан болған құрғақшылық өнімнің 40 пайызын жарамсыз етті дейді. Ал жанар-жағармай мәселесіне биыл шаруалар дән риза, оларға дизелдік отын молынан қолжетімді ақшаға берілген.

Сырым Бошпанов, облыстық ауыл шаруашылығы басқармасы басшысының орынбасары:

– Күзгі дала жұмыстарын жүргізуге облыс бойынша 15 мың тонна дизелдік отын жеңілдікпен бөлінген. Оның біздің операторлар шілде тамыз айларының көлемінде 10 мың тонна толығымен тасылып алынып, шаруашылықтарға 187 теңгеден босатып жатыр. Шаруашылықтар бүгінгі күні дизельдік отынның 84 пайызын тасып алды.

Фермерлер ауа райының қолайсыздығымен цифрлық технологияның күшімен күресіп жатыр. Биыл егістік жерлер ұлғайтылды, заманауи технологияның арқасында құрғақшылыққа қарамастан, жинайтын өнім баршылық, дейді шаруа маманы.

Владимир Чаус, шаруа қожалығының механизаторы:

– Әрине биыл құрғақшылыққа тап болдық, дегенмен өнім жақсы түсті. Техникамыз жаңа, тағы бір комбайн сатып алдық. Енді астықты жинау барысында ауа райы жақсы болса екен деп тілейміз.

Биыл Қарағанды облысында өсірілген бидай Еуропаға экспортталлады деп күтілуде. Бұл бидай сертификатталған органикалық өнім болып саналады. Өйткені астықты өсіру барысында ешқандай химикаттар қолданбаған, дейді мамандар.