Елімізде Еуроодақ талаптарына сәйкес келетін үй жануарларын сәйкестендірудің бірыңғай орталықтандырылған жүйеге көшуді жоспарлап отыр. Бұл туралы Ауыл шаруашылығы вице-министрі Ермек Кенжеханұлы мәлім етті.

— Министрлік ветеринариялық жүйе мен биологиялық қауіпсіздікті дамытуға ерекше назар аударады. Біріккен Ұлттар Ұйымының азық-түлік және ауыл шаруашылығы ұйымы біздің сұрауымызбен ауыл шаруашылығы жануарларын сәйкестендірудің ұлттық жүйесіне баға беруде техникалық қолдау көрсетті, ол үшін алғыс айтамыз. Сонымен қатар халықаралық ұйым ескірген платформаны жаңғырту бойынша «Бірыңғай орталықтандырылған жүйе» форматына көшіру бойынша құнды ұсыныстар берді, бұл оның Еуроодақ талаптарына сәйкестігін қамтамасыз етеді. Алайда, ұсыныстарды жүзеге асыру үшін қосымша техникалық қолдау қажет, осыған байланысты БҰҰ-ның азық-түлік және ауыл шаруашылығы ұйымы арқылы гранттар тарту немесе донорларды іздестіру жағын қарастырсақ, — деді Ермек Кенжеханұлы елордада өтіп жатқан ауыл шаруашылығы саласын дамытуға арналған дөңгелек үстел барысында.

Министр орынбасарының айтуынша, отандық ветеринариялық препараттар саласына да цифрлық бақылау жүйесін енгізу қажет.

— Осы орайда БҰҰ-ның азық-түлік және ауыл шаруашылығы ұйымы бюросымен бірлесіп, дүниежүзілік сауда ұйымының сауда стандарттары мен даму қоры (STDF) аясында гранттық қаржыландыру алу үшін өтінім әзірленіп, жіберілді. Біз бұл бастамамыздың қолдау табатынына үміттіміз. Қазақстан БҰҰ-ның азық-түлік және ауыл шаруашылығы ұйымымен ветеринариялық бақылау саласына халықаралық стандарттарды енгізу, мамандардың біліктілігін арттыру, сондай-ақ мал шаруашылығында аурулардың таралуын болдырмау және бақылау бойынша бірлескен шараларды әзірлеу бағытында жұмысты жалғастыруға дайын. Қазірдің өзінде БҰҰ-ның азық-түлік және ауыл шаруашылығы ұйымының техникалық қолдауымен елімізде «Бір денсаулық» тұжырымдамасы аясында ветеринария саласында үш жоба жүзеге асырылып жатыр, — деп толықтырды спикер.

Бұған дейін хабарлағанымыздай елімізде ауыл шаруашылығы өнімдерін қайта өңдеуді дамытудың кешенді жоспары қабылданды.

Айта кетейік, былтыр ауыл шаруашылығы өнімдері көлемі 13,7%-ға артып, сала үшін рекордтық маусым болды.

Дерек көзі: Kazinform