Ауыл шаруашылығы министрлігі ақтөбелік фермерлердің наразылығына пікір білдірді
ҚР Ауыл шаруашылығы вице-министрі Рүстем Құрманов Ақтөбе облысы ауыл шаруашылығы қызметкерлерінің митингісіне қатысты пікір білдірді, деп хабарлайды ҚазАқпарат тілшісі.
Үкімет отырысынан кейін БАҚ өкілдерінің сауалына жауап берген вице-министр ақтөбелік фермелер алдындағы субсидия бойынша қарыздың қайдан шыққанын түсіндіріп берді.
«Мәселе ең алдымен жоспарлауға байланысты. Өйткені, қаражатты есептеуге адамдардың саны негіз болған еді. Алдағы үш жылдық бюджетте есептеу жүйесін өзгертеміз, өңірдің өңірлік ішкі өнімін аламыз және бұл мәселені ескереміз. Жоспардан артық өндірілуі – бұл жыл сайынғы тәжірибе. Өндіріс те солай, еселеп асып кетуі мүмкін. Бірақ, бюджет мүмкіндігі шектеулі. Сол себепті қарыз өтпелі», – деді ол.
Оның атап өтуінше, субсидияға өтінімді тікелей әкімдіктер береді. Ал Ауыл шаруашылығы министрлігі ол өтінімдерді қарайды.
«Олар өнімді шығарып, қазіргі уақытта сатты. Енді олар шығарылған өнімге өтемақы алғылары келеді. Бұл шығыстар келесі жылдың бюджетінен өтелетін болады. Екі ай ғана уақыт қалды, қаңтарда біз ақша аламыз. 2020 жылы қарыз бойынша төлейтін айырманы бюджетті нақтылау барысында ескереміз», – деді Р. Құрманов.
Вице-министрдің дерегінше, ақтөбелік фермелер алдындағы қарыз – 4 млрд теңге. Ал жалпы еліміз бойынша мұндай қарыз сомасы 36,8 млрд теңге.
Естеріңізге сала кетсек, 4 қараша Ақтөбе облысында фермерлер митингіге шықты. Олар Ресейдің шекаралас өңірлерінен мал әкелуге салынған тыйымға наразылық танытып отыр. Сонымен қатар ол «Ырыс» және «Сыбаға» мемлекеттік бағдарламасы бойынша субсидия төлеудің кешігуіне алаңдаушылық танытуда.
Загрузка ...