Павлодар облысы Железин ауданында крахмал зауыты салынады
Ауданда зауытқа қажетті шикізат – өндірістік картоп өсірілмек, деп хабарлайды pavlodarnews.kz тілшісі.
Бұл туралы өңірлік коммуникациялар қызметінде өткен баспасөз жиынында Железин ауданының әкімі Қанат Қашкиров мәлім етті.
– Ауданымызда крахмал өндіретін зауыт салынады, – деді Қанат Қашкиров. – Оған шикізат керек. Сондықтан картоп өсіріледі. Қарапайым картоп емес, өндірістік картоп өсіріледі. Сондай-ақ көп жылдық шөп өсіру ұсынылуда. Жоңышқа өсіріп, өңдеп, Қытайға сату көзделген. Бұл – өңдеу бағыты. Суармалы кластерге жатады.
Ал, суармалы алқаптың көлемі Железин ауданында жыл сайын артуда.
– Қазіргі уақытта егістік алқаптардың 9,3 мың гектары суармалы болып табылады, – деді аудан әкімі. – 2023 жылға қарай 2 есеге ұлғайтып, 18,5 мың гектарға жеткізсек дейміз.
Қанат Қашкировтың айтуынша, бүгінде зауыт салынатын жер анықталған. Қазір жерді зауытқа рәсімдеу жұмысы атқарылуда.
– Инвестор бар. Ол қаржыландыру жағын талқылауда. Келер жылы зауыт құрылысын бастау жоспарлануда, – деді аудан әкімі.
Загрузка ...