Солтүстік Қазақстан облысындағы Покровка ауылының тұрғындары қолдағы азын-аулақ малын түгел сатқалы жатыр, деп хабарлайды «Хабар 24».

Себебі жем-шөп қымбаттап кеткен. Ал жергілікті билік «жағдай бақылауда» деп жайбарақат отыр.

Ардақ Асылханұлы:

– Наталья Шмилык қолдағы азын-аулақ малына қорадағы қалған шөпті үнемдеп беріп жүр. Тойып жемегесін сиырлар арықтап кеткен. Енді оны сатудың өзі қиын болып тұр.

Наталья Шмилык, Покровка ауылының тұрғыны:

– Көтерем малды ешкімнің алғысы келмейді. Көреді де, бас тартады. Өзіме сойып алудан басқа амал жоқ. Қаншама асырадым, есіл еңбек зая кетті.

Биыл Солтүстік өңірде мал азығы бірнеше есеге қымбаттап кеткен. Мәселен, буылған шөптің бір данасы 12 мың теңгеден асады екен. Сергей Фабердің қолында 12 бас ірі қара мен 1 жылқы ғана қалған. Барлығын сатуға бел буып отыр. Өкініштісі, ауылдағы фермерлер шөпті жаппай оңтүстік өңірге жөнелтуде. «Ал жергілікті жұрттың өтініші ескерілмей қалды», – дейді ол.

Сергей Фабер, Покровка ауылының тұрғыны:

– Далада шөп жеткілікті. Шаруалар шауып жатыр. Бірақ бағасы 12 мыңнан түспей тұр. Мысалы, маған 200 дана буылған шөп керек. Сонда 2,5 миллион теңге төлеуге тиіспін. Бұл масқара ғой.

Ауыл маңында 6 шаруа қожалығы шөп шабумен айналысады екен. Ал Покровкадағы мал басы – 254. Қазір азық тапшылығы мұндағы барлық тұрғынның бас ауруына айналған.

Медет Оспанов, Есіл ауданының әкімі:

– Жергілікті тұрғындар үшін шөп шауып, сатып жатқан кәсіпкерлер бар. Бағаны 5 мың теңге деп қойдық. 12 мыңнан төмен шөп жоқ қой. Ондай баға болса қуана алатын едік.

Бірақ соған қарамастан әкім «шөптің бағасы қымбат емес» деп отыр. Алайда жарнама бойынша қоңырау шалғанымызда ақиқат расталды.

Халықтың наразылығына қарамастан өңірдегі ауылшаруашылық басқармасы «жағдай бақылауда» деп жайбарақат отыр. «Қазірдің өзінде 578 мың тонна шөп әзірленді», – дейді. Бұл жылдық жоспардың 70%-і.