«Парасаттың» қарбызы

Күз келісімен ауылдағы шаруалар жаздай баптап, өсірген көкөніс, жеміс-жидегін жинап, алған өнімін сатады. Ырғыз ауданы Нұра ауылындағы «Парасат» шаруа қожалығы биыл алғаш рет қауын-қарбыз егіп, 80 тоннаға жуық өнім жинапты, деп «Ақтөбе газеті».

Шаруашылық басшысы Самғат Әбеновтің айтуынша, «Парасат» шаруа қожалығы осыдан үш жыл бұрын құрылған. Ағайынды Әбеновтер ірі қара өсірумен қатар биыл бау-бақша егуді қолға алыпты. Ауыл маңындағы Уәли қыстауынан жер алып, 3,5 гектарға қауын-қарбыз, қияр, қызанақ, тәтті бұрыш, картоп еккен.

Фото: ©rawpixel / pixabay.com
Фото: ©rawpixel / pixabay.com

— Биыл қауын-қарбызды бірінші жыл еккенімізбен, жақсы өнім алдық. Жер құнарлы болғандықтан, бақша өнімдерін күтіп-баптауда қиындықтар болмады. Сол еңбегіміздің жемісін көріп, алған өнімдерімізді сауда орындарына тапсырдық. Облыс орталығында Ырғыз ауданы күндері аясында өткен ауылшаруашылық жәрмеңкесінде 4 тонна қарбыз саттық. Ауылдың дәмін қала тұрғындары қызығушылықпен алып жатты. Алдағы уақытта жер көлемін ұлғайтып, қауын-қарбызды биылғы жылдан көбірек еккіміз келеді. Жоспар көп, сондықтан келер жылы көп еңбектену керек, — дейді шаруа.

Оның айтуынша, соңғы жылдары Нұра ауылдық округінде бақша өсірумен айналысатын тұрғындардың саны артқан. Бұрын ауданға қауын-қарбыз Қызылорда, Жамбыл облыстарынан келсе, қазір жергілікті шаруалардың өнімдерін алушылар көп.

Бау-бақшаға суды Торғай өзенінен сорғымен тартып, суарамыз. Биыл жаздай өсімдіктерді күтіп-баптау, арамшөбін отау, өнімді жинау, басқа да жұмыстарды отбасымызбен атқардық. Қазір қысқа мал азығын, отын жинау жұмыстарын жасап жатырмыз. Келер жылға жерді тазартып, дайындаймыз, — дейді Самғат Әбенов.

Айта кету керек, бүгінгі күні Нұра ауылында 100-ге тарта түтін бар. Ал округ бойынша 23 шаруа қожалығы, 16 кәсіпкерлік нысаны тіркелген. Кәсіпкерлердің дені балық аулаумен айналысады.

Поделиться материалом

Читать ещё

  • Опрос

    Каковы перспективы у запрета на импорт пшеницы в РК?

    Показать результаты

    Загрузка ... Загрузка ...
  • Архивы