2024 жылдың 26 қазанынан бастап Қазақстан аумағынан үшінші елдерге және Еуразиялық экономикалық одақ елдеріне өгізшелер мен тоқтыларды экспорттау квотасын бөлу қағидалары күшіне енеді, деп хабарлайды АШМ баспасөз қызметі.

Бұл норма алты ай мерзімінде әрекет етеді.

12 айдан асқан өгізшелерді әкетудің сандық лимиті 85 мың басты құрайды, оның ішінде бордақылау алаңдары үшін — 55 мың бас, тауар өндірушілер үшін — 30 мың бас.

6 айдан асқан еркек тоқтыларды әкетудің сандық лимиті 120 мың басты құрайды, оның ішінде бордақылау алаңдары үшін — 60 мың бас, тауар өндірушілер үшін — 60 мың бас.

12 айдан асқан өгізшелерді әкетуге бір бордақылау алаңына арналған лимиттің жиынтық саны 4000 бастан аспайды, ал бір тауар өндірушіге — 500 бастан аспайды.

6 айдан асқан еркек тоқтыларды әкетуге бір бордақылау алаңына арналған лимиттің жиынтық саны 1000 бастан аспайды, ал бір тауар өндірушіге — 500 бастан аспайды.

Бұл ретте, бір бордақылау алаңына берілетін квота бордақылау алаңы қуатының 20 пайызынан аспауға тиіс және квотаны бөлу сәтінде бордақылау алаңындағы мал басының нақты саны сұратылған квота көлемінен екі есе көп болуға тиіс. Квоталар толық таусылғанға дейін бөлінеді, – деп толықтырды ведомство.

Сонымен қатар, квоталар «Е-лицензиялау» порталында бөлінеді және «Сандық шектеулер (квоталар) енгізілген кезде тауарлардың жекелеген түрлерінің экспортына және (немесе) импортына лицензия беру» мемлекеттік қызмет көрсету қағидаларына сәйкес жекелеген тауар түрлерін экспорттауға лицензия алу кезінде автоматты түрде беріледі.

Квоталар санын бөлу кезінде ауыл шаруашылығы жануарларының иелері туралы деректер, сондай-ақ ауыл шаруашылығы жануарларының саны туралы деректер ауыл шаруашылығы жануарларын бірдейлендіру жөніндегі дерекқор және «E-Agriculture» агроөнеркәсіптік кешен салаларын басқарудың бірыңғай автоматтандырылған жүйесі» ақпараттық жүйесі арқылы расталады.

Бұған дейін хабарлағанымыздай, шетелдіктер сапасына жоғары баға берген қазақстандық ірімшік экспортқа шығарылатыны белгілі болды.

Сонымен қатар, Түркістан облысы ет экспорты бойынша Қазақстанда көшбасшы атанды.

Дереккөзі: Kazinform